何雁詩噚日踏入25歲，前晚同大班藝人朋友開P狂歡，佢喺Ig晒大合照多謝好友，用英文留言：「如果今年有一件事需要記住，那就是我學會了愛，相愛，愛自己。謝謝我的朋友，我真的是一個幸運的女孩，讓你們每個人都是我的朋友。我很幸福！不能更感謝！」
呢張相有20幾人，緋聞情侶劉佩玥同周志文不避嫌排排坐，仲有黃子恆、洪永城、翟威廉、陳瀅、羅天宇、周志康、王敏奕、糖妹、甄澤權等等，其中企喺壽星女後面嗰個人，就被何雁詩用心心圖案遮樣懶神秘，點知被豬一樣嘅隊友翟威廉喺Ig貼原相踢爆，心心底下嘅鄭俊弘即刻無所遁形，後知後覺嘅翟威廉15分鐘後先急急刪相，不過仍然係於是無補。
何雁詩回覆傳媒否認叫翟威廉刪原相：「溝通上有啲誤會。」問到點解要遮住男友個樣？佢表示：「個心心幾襯佢塊面，儘量都低調少少啦，知還知見還見嘛。」笑問男友係咪唔見得人？何雁詩即刻護航：「佢見得人，但係儘量都唔喺我個社交平台啫。」係咪畀公司鬧？佢賣口乖話：「我好乖㗎！」之前仲傳兩人情海翻波，o依家男友現身生日會，即係冇事啦？何雁詩話：「係喎，唔知點解無啦啦傳。」
更多娛聞，喺晒《娛果》
http://fb.com/appledailyent
 |  何雁詩開25歲生日會，好多朋友出席，身後一位人兄俾心心遮樣。（ig圖片） |  除咗心心男，坐喺前排仲有緋聞情侶劉佩玥同周志文。（ig圖片） |
 點知翟威廉post相時，就擺咗張原相上ig，心心男極速露底，原來係鄭俊弘。（ig圖片） |  男外仲有朋友擺咗幾張生日蛋糕相。（ig圖片） |  兄弟合照都見唔到鄭俊弘身影。（ig圖片） |
 都係嗰句，豬一樣的隊友唔會少，錯手貼原相嘅……其實唔只翟威廉。（ig圖片） |
