周潤發89年演出嘅《賭神》為佢嘅電影事業登上第二個高峯，佢演繹嘅賭神高進真係好鬼深入民心，風采至今仍然令人難忘，唔少影迷仲相信現實中嘅發哥真係賭神，可以喺賭枱大殺三方，乜鬼類型嘅賭都識，如果大家係咁諗就真係大錯特錯，其實真正嘅賭神唔係周潤發，係周潤發嘅老婆陳薈蓮！
點解會咁樣，原來發嫂後生嗰陣喺新加坡，跟佢爸爸學識唔少賭法，廿一點、話事啤、十三張、牌九、麻雀、大細都玩過，而且好有賭運同技術，聽聞發哥演賭神時都有向老婆取經，所以女賭神其實係發嫂，好，聽下發嫂自己講俾大家聽：「周潤發梗係唔係賭神，我先係賭神呀！因為年年我都有一班朋友喺新年就嚟我屋企拜年，咁食完飯大家會開賭局，我仲會做莊！幾粒鐘會輪流玩廿一點、魚蝦、大細等等，我真係年年贏到開巷！」
發嫂落場做莊，發哥又會否會落場玩一兩局呢？發嫂笑說：「唔會啦！唔好啩！兩公婆賭，邊度好玩呀！同朋友玩好啲，其實佢唔賭嘅，因為冇興趣，頂多唔夠麻雀腳，新年就幫忙戥腳，唔玩就會幫我服侍啲朋友囉！咁上下佢就先行上房休息。倒返轉頭我就好有興趣研究，而且係好有賭運，譬如玩廿一點，成日攞到3條7喎！好似我有嗰個magic power去控制個牌，玩到興起時，成身出晒汗不特止，我仲企喺凳上面甩牌，大家係唔可以想像到我可以咁樣，朋友全部輸晒，佢哋真係想死，成班人鬧我一定係作法嚟，現場真係好開心，好多歡樂聲，所以新年賭一次錢幾開心㗎！」
