噚日有雜誌封面指吳業坤靠鬼神催運，坤哥今日去到商台宣傳新歌《孝順》同埋錄廣播劇，佢苦笑指未試過同兩個男人一齊上封面，就當作為新歌宣傳，加上報道中司徒法正及泰國法科師傅Frankie都冇開名指藝人是誰，所以今次係「躺著中槍」，坤哥強調冇拜狐仙同種生機。
坤哥直認係惹事非，佢笑指如果真係有拜嘢，又點會咁多事非：「我係無神論，自細媽咪去拜神咪拜，所以我相信有鬼神，但唔係信死一個宗教。」
至於有冇去過司徒法正同Frankie道壇，佢指未去過司徒法正度，反而喺2012年前經朋友介紹認識Frankie時，對方有表示如有需要可以幫忙，坤哥話：「當時諗當識個朋友，冇乜所謂，跟住去到佢鋪頭，見到有個人客印堂發黑，做咗個法事後就嘔咗啲黑色嘢出嚟，冇得唔信咁超自然嘅事，咪寧可信其有。」跟住Frankie畀咗個護身符佢，坤哥袋咗一排，覺得冇乜用就歸還對方。
問到袋咗護身符係咪多咗工作機會？佢話：「只不過係安心，阿媽都畀好多護身符我。」佢認為最重要係做好自己，若果唔係袋一百道符都冇人理。
講番首歌……新歌《孝順》係佢唱法上嘅一次突破，將之前學唱歌技巧加入去，令音域提高，希望未來有一系列呢種唱法嘅歌。
