「一拳打爆個籃球」不再是夢，因為馬雲做得到！
馬雲投資兼主演嘅電影《功守道》將於12日00：00am上映，噚晚佢率領李連杰、吳京、甄子彤等《功守道》演員出席喺上海舉行嘅登天貓雙11狂歡夜，仲重金邀請咗奧斯卡影后妮歌潔曼現身，同場仲有章子怡、女子網球「全滿貫」嘅舒拉寶娃、莫文蔚、范冰冰、吳亦凡、李宇春等。
狂歡夜上播映咗長達約7分鐘嘅《功守道》精華版，值得一提嘅係，其實部電影都係得20分鐘長，但精華版已經佔咗1/3，咁套戲.....真係要睇過先知有幾精彩。
講番精華片段，當然係以男主角馬雲一個打11個作招倈，戲中馬雲飾演太極宗師「馬師傅」，一出場剩係得個背影，但擁有懾人氣勢，因為佢一出手就一拳打爆咗個籃球，跟住馬雲先後同甄子丹、吳京、劉承羽、朝青龍等對打。馬雲嘅表情唔多，但都有爆金句﹕「武功再高，也怕菜刀。」就連出名好打得嘅吳京都要用四支木棍撐地，輸得好慘。
而馬雲要打嘅「最後大佬」應該就係李連杰，見李連杰一直處於下風，避唔開馬雲嘅掃腿同出拳連番倒地，最後要出真武功，雖然未知誰勝誰負，但最後一幕就係馬雲一躍而跳奪取大石上嘅卷軸.......。未完嘅，精華片最後分半鐘仲有馬雲solo耍太極，呢分半鐘真係精采，馬雲一邊耍太極，後面就狂加Effect又風又浪又潑墨，咁又係嘅，冇咗呢啲effect，可能半分鐘都頂唔到。
片尾就係，動作影星積遜史迪咸（Jason Statham）、菲律賓拳王Manny Pacquiao同世界中量級拳王戈洛夫金拍片向馬雲下戰書，唔知係咪咁快有續集呢？！
