啱啱過咗生日嘅周柏豪，最近買咗架約70萬嘅Ford嘅野馬跑車，仲安咗佢好「柏豪」feel嘅自訂車牌o添，日前仲俾人點咗相……有網民喺佐敦德興街影到佢架車，仲放咗喺「馬路的事討論區」fb專頁問「有冇人識周柏豪？快啲叫佢返嚟揸走部車。」相見到柏豪部車咁啱泊咗喺街尾，有旅遊巴轉入時頂住咗，轉唔到彎。
事後柏豪接受《蘋果》訪問時，解釋番件事，佢話:「冇吖，嗰度係酒店位落客區，旅遊巴落客啫嘛，我停咗喺度，嗰度唔係雙黃線，嗰度係停到車，我喺架車裡面，咁我阻人咪走囉，冇乜解釋。」（新聞連結:http://bit.ly/2juEzur
)
今晚柏豪到尖沙嘴海港城出席MONCLER旗艦店開幕活動，再次解釋：「其實我冇亂泊車，我冇阻到人o架，嗰個位係夠過，o依家出到嚟變咗咁嘅新聞，我都無謂多講。總之我本身都係一個好留意人哋點泊車嘅人，嗰個討論區我自己都有follow，嘅，我係裡面嘅會員嚟嘅。我自己都會謹慎啲，再……再揸番緊啲。」
問到會唔會覺得自己成日「出事」，佢就話：「係咁o架啦，一個活躍嘅藝人，一定係會備受注視嘅，呢個係必然嘅事嚟嘅。」現場忽然一片靜默……見大家冇反應，佢再加多句：「係呀。」
柏豪話：「我想講番當日個女仔係我老婆嚟嘅。」
