大型音樂節Clockenflap前晚喺中環海濱繼續唱，夜晚7點半，着牛仔熱褲騷腿嘅Heidi@Super Girls現身睇騷，同行有位女友人，兩女入場先去買啤酒飲，之後漫無目的周圍行，終於行到去主舞台，Heidi見到903 DJ梁文禮，即刻熱情打招呼，兩人傾咗兩句，Heidi就揈手跳舞睇騷，表現high爆。
其間有個四眼肥仔發現Heidi，即刻黐住女神傾偈吹水，仲捉咗Heidi去後面人少少冇咁嘈嘅地方，兵仔上身用手機幫女神影相，Heidi擺出港女十式擺甫士，四眼肥仔又踎低又搵靚角度，用足心機影靚相，見佢影咗好多張，Heidi終於滿意收貨，之後Heidi就同女友人及四眼肥仔玩自拍，《蘋果》向Heidi問到四眼肥仔係咪裙下之臣？佢喺電話表示：「其實前晚大班朋友去睇騷，有男有女，嗰個男仔係我好好朋友兼造型師，多謝大家關心。」
而吳浩康（Deep）都喺隔離同朋友吹緊水，Heidi見到阿Deep傾緊傾，冇主動打招呼，Deep同友人喺下晝4點幾已經入場，佢用大會嘅logo長巾當披肩用，好似超人咁披住行嚟行去，其間有人叫佢停低合照，Deep都友善影咗張相，之後就同友人去咗吸煙區吞雲吐霧，扯完煙後後就入咗國泰VIP區。至於徐濠縈就撇甩老公陳奕迅，孖女友人喺夜晚10點幾現身，當時已經落緊雨，冇帶遮冇着雨褸嘅阿徐冒雨行入會場，佢邊行邊望台上歌手表演，明顯對音樂會好有興趣，一行三人行去adidas攤位，因為落雨關係，好多人喺攤位入面避雨，阿徐目光離唔開舞台，全程望住歌手唱歌，十分投入。
