今日喺無綫台慶大日子，下午一班小生已經返晒去電視城行綵排。「毒男坤」吳業坤剛啱就喺facebook貼咗一張「50男」相片，視帝陳展鵬、王浩信、蕭正楠、馬國明、袁偉豪等全部都係到。

唔好以為個個大男人，素顏Look就冇嘢睇，有眼利網友，一眼就留意到相中企最右邊嘅洪永城，留言﹕「洪永城肥到咁.....估唔到喎。」坤哥唔小心出賣咗洪永城呢個頹廢look，確實係令人有少少意外，因為洪永城平日官仔骨骨，但自從同唐詩詠分手後，成個人就好似謝晒。影大合照，其他人個樣勁有朝氣蓬勃，只得洪永城「吱」都唔識笑，舉高手仲唔小心見到個凸肚腩，睇嚟佢真係要努力keep fit。

另一邊廂，前度「最佳女朋友」唐詩詠今日亦有喺ig派福利，上載一張着住全白色貼身衫，件衫啱啱遮到pat pat，露出白滑長腿坐喺窗台前，隱約見到佢好似齋着打底褲。詩詠用英文留言：「一切都是無常的，所有的痛苦和幸福都是無常的。你唯一能信懶的就是你的本性。」其實類似嘅相係今年5月，詩詠同洪永城分手時已經上載過一次，當時佢感嘆「笑看人生」，今次又咁感性，唔知又有咩事發生咗？！


更多

(fb圖片)唐詩詠今日都有post相，望住窗外，好似好有feel。(ig圖片)坤哥唔小心post咗張洪永城嘅凸腩相，有網民即刻搵到亮點。
那些年的唐詩詠與洪永城