28歲嘅劉佩玥入行4年緋聞多多，經常被指收兵嘅佢，同有「花王」之稱嘅周志文傳秘撻一段時間，而另一位男主角就係俾大家話係「兵仔」嘅翟威廉。3個人日前濟濟一堂現身由威士忌品牌贊助嘅藝人慈善籃球賽，同場仲有何雁詩、陳瀅、羅天宇同陳偉琪等人。
呢個籃球賽當晚喺灣仔修頓球場舉行，大約8點鐘大家都入晒場睇比場，劉佩玥嗰晚同何雁詩、兩個女友人同一個男友人一齊到，不過未到周志文同翟威廉出場嗰時，劉佩玥對場內比賽緊嘅球隊就完全無興趣，除咗攞住手提電話係咁篤，有時就同坐喺側邊嘅男友人傾偈，但到周志文同翟威廉出場時，劉佩玥態度就180度轉變，即刻放低電話之餘，仲不時興奮狂嗌，本來同佢傾緊偈嘅男友人，坐坐下都無癮咁自己調住同何雁詩坐，點知何雁詩仲誇張，攞住酒又un又跳。
唔知係咪劉珮玥喺現場，翟威廉同周志文嗰晚都好落力打，當翟威廉入咗個2分波時，劉珮玥就high到舉高手大嗌，最後翟威廉一隊打到加時終於贏2分勝出，劉珮玥即刻走落場同佢哋傾偈，不過就冇乜點理到翟威廉同周志文，反而同細孖周志康傾得好開心，講講下又會打周志康手臂咁，嗰晚陳偉琪都有去現場，見到羅天宇都有傾下偈。
據知，嗰晚嘅籃球賽完場後有party，所以周志文、翟威廉等人打完波就坐的士離開，劉珮玥就同何雁詩等幾個朋友去餐廳醫肚，不過劉佩玥只係坐咗20分鐘就獨自駕車返TVB。而陳瀅嗰晚喺周志文嗰隊未開波前就走人，離開時仲俾兩個男fans捉住影相，雖然陳瀅好似有啲趕時間，但都有滿足咗佢哋先離開。
