劉德華今晚喺海港城出席聖誕亮燈活動，吸引大批市民圍觀。華仔精神奕奕由廣場長樓梯下來再上台，最令現場樂迷開心係華仔預告入紙申請明年紅館聖誕檔期。
今年一月，華仔喺泰國拍廣告不慎墮馬受傷，原定今年舉行嘅紅館跨年演唱會同大陸演唱會要全部煞停。華仔今晚喺在台上接受司儀訪問，表示今年聖誕願望係入紙申請明年聖誕紅館檔期，台下即傳來熱烈歡呼聲，華仔隨即講笑：「我講下架咋，大家又信呀！」
華仔又話，本來聖誕節有工作，但今年因為驚喜（暗示墮馬意外)所以有變動，佢話：「有時間吉咗，會接多啲慈善活動，等大家見到我真係完全康復。」今晚活動大會係咪真係要求過佢騎馬出場？華仔講笑謂：「之前真係有騎馬出場，但都唔記得，可能跌一跌唔記得咗！」華仔又指今年聖誕節唔會外遊，因為機票太貴，記者笑佢都怕貴？華仔即表示：「賺錢都唔會亂使，可能會喺屋企搞下小型party，公司都會有啲party。」聖誕有咩禮物俾囡囡？佢話唔會，但囡囡通常喺節日會畫畫送俾佢。
關於佢話入紙申請明年紅館演唱會，華仔表明：「想試下！所有嘢未諗架！如果得想喺香港先，但香港show係自己公司搞，啲期可以就下，但大陸嗰啲真係債主，所以都要睇檔期同埋準備成點。」
問佢會否減少喺演唱會做高難度動作？華仔表示：「做能力範圍以內嘅事，以前鍾意跳跳紮，o依家唔得喇，所以要研究吓歌藝。」佢又笑謂：「靠樣咁多年，終於要靠歌藝，可能呢年要學吓唱歌。」
同場嘅歐陽妙芝亦表示今年聖誕節唔會外遊，因囝囝有芭蕾舞表演，鄧鉅明今晚未有同太太嚟，佢話太太知道現場靚女多，所以俾佢一個人嚟，講完又隨即隔空冧太太：「當然佢喺我心中係最靚啦！」
 攝影：葉君海 |  呢個咁型嘅身影… |  |
 梗係華仔啦，佢話今年會接多年慈善活動。 |  年初墮馬受傷，今年尾嘅跨年演唱會取消，華仔預告入紙下年紅館聖誕檔期。 |  |
 |
