林作講嘢成日冇句真，又口花花鍾意撩女仔，結果去年9月就畀拍拖3年嘅「十優港姐」麥明詩飛咗。究竟麥明詩同林作係真分手，定玩地下情，真係要當時人先知道喇。
上周六(18號)，麥明詩身邊又有「兵仔」登場，讀者鄭先生日前透過《蘋果》爆相爆片，透露上周六凌晨四點幾，喺油麻地一間麥當勞見到麥明詩同一位青靚白淨嘅後生仔一齊食消夜/早餐，鄭先生話﹕「大約凌晨4點半見到佢哋，當時食客唔多，大部份都係露宿者，突然見個靚女就望吓，原來係麥明詩。」當日麥明詩只係化淡妝，紮髻加副眼鏡，打扮都幾街坊，鄭先生繼續話﹕「個男仔都幾後生㗎，有啲似小白臉，最初以為佢哋拍戲，但見佢哋坐咗差唔多一個鐘都未走，全程有傾有講，好開心咁，我想搵佢影合照都唔好意思。」
被問係咪「收兵」？麥明詩噚日接受傳媒訪問時話﹕「其實我先係兵，我送佢返屋企，我住圓方，對方住佐敦附近，順路兜埋。」麥明詩透露個男仔係大學同學，一班人玩完順便車對方返屋企，期間又肚餓，就搵個地方坐低食嘢喇。咁點解又係麥記？麥明詩解釋﹕「咁夜麻麻冇乜地方可以食囉。」
 (圖片﹕讀者鄭先生提供) |  麥明詩日前被讀者影到與青靚白淨男士，一齊係麥記撐台腳。(讀者鄭先生提供) |  (讀者鄭先生提供) |
 麥明詩與林作情已逝。(資料圖片) |  麥明詩與張存華曾於淺水灣密會。(資料圖片) |  何浩文與麥明詩拍劇時經常耍樂，但之後何浩文已有新戀情。(網絡圖片) |
 麥明詩與余德承拍《誇世代》時傳緋聞，但女方已決絕表明冇發展機會。(網絡圖片) |
