今年86歲胡楓(修哥)，出年2月紅館開騷。今日修哥喺九展開胡楓《86破哂紀錄》演唱會記者會，仲宣佈開兩場演唱會，來撐場嘅嘉賓有羅蘭、森森、斑斑、方國珊等，修哥一班朋友曾志偉、鍾嘉欣、苗僑偉、戚美珍、黎耀祥、陳豪等，仲拍片祝賀修哥再開騷，契仔張學友仲拍片話：「契爺啟發我哋，只要生活檢點，健康一啲，可以唱好耐歌，之前以為我56歲開騷，覺得自己好叻，原來我仲有30幾年可以唱，多謝契爺，努力啲，唔好丟架！」修哥嘅多年老友蕭芳芳，仲錄聲話修哥有四得：「食得、唱得、跳得、講得。」
修哥西裝骨骨現身主場，台上被人問佢會唔會請齊其他3個小生，佢話：「今次個活動，跑步練氣，其他都唔理交俾主辦。」講到請嘉賓，修哥話自己面皮好薄，佢話：「我兩場，我都係做份內事，我咩都唔會理，我面皮好薄，咩人我都唔會叫，雖然係破咗最大年紀開騷紀錄，86歲，係大件事，但係契仔契女叫咗好多次，再叫人唔好意思，我樣樣唔怕醜，請嘉賓會面紅，到時一月會知道。」
修哥之後接受傳媒訪問，佢話呢排好忙，要練氣，又要拍劇集，又要做東華，雖然唔夠瞓，但係好充實，問佢會唔會騷肌，佢話：「都86歲，邊有肌肉，但係啲肉想實啲，上台唔夠氣無人幫到你。」講到四個小生合體，佢話：「我梗係想成班朋友來，唔止呢兩位曾江、謝賢，呢兩個識咗60年，好唔簡單，佢哋後生都成日鬥嘴。」
記得2012年修哥開「80歲大壽演唱會」，佢一邊講一邊走到升降台邊，差一步就跌落去，好彩當時全場觀眾尖叫喝止佢，6年後再開騷，會唔會要求舞台設計係無窿，佢話：「無理，咁我唔行，嗰次跌我唔緊要，上次憶蓮stand by緊，如果我跌落去，我就唔安樂。今次我唔會跳咁多，心境我雖然係26，但我係真係86歲。」
 攝影：仇志德 |  今年86歲胡楓(修哥)，出年2月紅館開騷，今日修哥喺九展開胡楓《86破哂紀錄》演唱會記者會。 |  宣佈開兩場演唱會，來撐場嘅嘉賓有羅蘭、森森、斑斑、方國珊等。 |
 |  修哥破咗紅館最大年紀開騷紀錄。 |  |
 |
