鄭子誠於香港電台主持嘅節目《音樂情人》搬上電視，分別搵嚟麥潔文、露雲娜、張崇基、張崇德等人擔任嘉賓，現場深情演繹歌曲，4集內容分別為愛情同親情等，鄭子誠今日出席活動表示希望用畫面傳達感情，而每位嘉賓都經過悉心挑選。
露雲娜提到暗戀自己31年嘅丈夫，鄭子誠笑言自己鍾意露雲娜40多年，露雲娜笑說：「你遲咗表達，你把聲咁靚，如果唔係我會考慮。」至於認識多時嘅張崇德、張崇基兄弟，鄭子誠擔任細佬婚禮司儀，一度怕叫錯名字。另外，麥潔文指錄影時重提父親都眼濕濕，而蔡立同歐陽德勛於節目首談感情，雖曾分手但各自反省後終成眷屬。
