愛犬之人梁靖琪（Toby）近年轉養貓，佢覺得養貓冇養狗咁黐身，貓咪較獨立，Toby話高峰期家中收養咗4隻貓：「全部係老貓，人哋養唔到，我領養返嚟，我主要收養老貓，係希望佢哋臨走嗰段路，可以畀佢哋一個安樂嘅家。」老貓多病，隨時被「死神」召喚，Toby話o依家屋企只走剩1隻Pow Pow，其他3隻老貓都先後離開。
Toby最錫嘅Mui Mui日前先走咗，Toby都有喺Instagram留言悼念，講起Mui Mui，Toby即眉頭緊鎖，一臉哀傷話：「Mui Mui係5、6年前朋友畀我，佢年多前發現患癌，醫好佢，估唔到相處日子唔多，Mui Mui大約15、16歲，呢幾年，我習慣佢喺身邊，佢走，我喊咗幾日。」
「我嗰日開早班，我都知Mui Mui好辛苦，我係feel到，我出門口時叫佢等埋我，我話拍一場戲就返嚟，我拍完即趕回家，我抱咗佢去睇醫生，佢已瀨尿落我條褲度，我同Mui Mui講：『媽媽知你好辛苦』，我同醫生傾過，唔想佢咁痛苦，不如由得佢走得安樂，動物或人病時，一樣係好無助。」Toby形容同Mui Mui感情好深：「佢喺我最需要愛嘅時候，出現咗。」據知Mui Mui給Toby送愛的時間，正係14年Toby同前夫黃敏豪離婚，全靠Mui Mui的陪伴，令Toby走出人生低潮，Mui Mui是Toby最好嘅傾訴對象。
Toby堅持要收養老貓，佢話：「我哋其實冇乜可以做，只係想佢哋最後段路走得開心，畀最大愛佢哋。」所以日後Toby仍會繼續收養老貓，佢打算收拾一下心情，再為Pow Pow添伴。
 |  Toby最錫嘅Mui Mui日前先走咗，Toby都有喺Instagram留言悼念（ig圖片） |  |
