李克勤今日到新城宣傳新歌《龍鬚糖》，佢話o依家每首歌嘅宣傳時間比以前長咗好多，平均都要幾個月：「喺香港就盡量做啦，而且今個星期係運動周，撞正香港羽毛球公開賽，一班球手林丹、李宗偉佢哋都嚟香港打比賽。」
克勤話噚晚特登招呼球手們食飯見面：「雖然比賽撞正宣傳期，但都盡量抽時間去睇，頭先至抽45分鐘去睇林丹比賽，始終佢哋呢啲打一場少一場。」
講到今年聖誕，克勤話可以留喺香港，咁會唔會帶小朋友出國旅行？佢話：「應該唔會啦，學劉德華話齋，啲機票咁貴真係唔合理，冇理由做大水魚。」克勤仲話寧願將買機票啲錢用嚟喺香港同小朋友開聖誕party，或者帶佢去迪士尼好過。
 近日克勤都有同球員們食飯，好好盡地主之誼。（李克勤Instagram圖片） |  仲有落場比試（李克勤Instagram圖片） |  克勤班波友，包括葉蒨文同朱玲玲等都有現身。（李克勤Instagram圖片） |
