楊怡同羅仲謙今晚喺時代廣場為史諾比聖誕主題開幕做主禮嘉賓，兩公婆合體掘金，謙謙笑言同老婆好耐冇齊齊工作：「有一段時間，冇一年咁耐，反而好耐冇同太太拍戲，想同佢一齊合作拍劇。」隔籬嘅楊怡就提到最近忙返大台拍劇：「停頓咗兩年冇開劇，要追番節奏。」


講到二人各有各忙，會唔會影響造人？謙謙即講笑：「係，社會真係好難做人，嚟緊呢段時間留喺香港耐啲，希望喺香港過聖誕，大家都鍾意一家人熱鬧。」之前講到二人想趕生BB，謙謙更被「扯乾」，今日謙謙就好飽滿，有堪輿學家講到佢哋喺出年同後年先有機會造人成功，謙謙笑言有留意報道，而楊怡亦表示有聽過：「承你貴言，呢個range好闊，自己都想，呢個都係天意。」


喺活動入面，楊怡提到想去聖誕老人村，不過佢就話今年成事機會唔大：「今年忟啲，要計劃同家人去，帶埋小朋友，我啲姨甥、家姐，大人細路一齊去，拍劇拍到12月，之後大家都要開工，未必今年可以去到，家姐已搵定我開聖誕派對，o依家仲心大心細，留喺香港定去第二度。」



（攝影：沈健程）楊怡同羅仲謙今日夫妻檔出席活動
佢哋話過聖誕鍾意熱鬧啲講到造人大計，楊怡話係天意。