進入結局篇嘅台慶劇《降魔的》，喺人魔大戰嘅前夕，估唔到又有一個催淚位！話說前一晚講何遠東執到個電話之後，同咗趙永洪一齊交去警署，點知途中趙永洪話要捉一隻罕有嘅精靈，雖然何遠東趕住去上水接客，不過都停車等埋佢。點知何遠東停車嗰個位，撞正黃子恆差遣變咗做魔嘅李嘉喺天台殺上司方Sir，最後方Sir俾人掟咗落樓，咁橋就跌正喺的士上面，坐喺司機位嘅何遠東頸骨斷裂，當場死亡。


因為貪玩累死兄弟嘅趙永洪，同馬國明喺急症室嗰場戲，亦係另一個高潮位，趙永洪先係忍住唔講嘢，到目無表情地咁鬧自己，點解咁貪玩累死自己嘅朋友，點解死嗰個唔係佢，跟住趙永洪喺鏡頭面前爆喊，一拳又一拳咁打落自己塊面，一直喺佢面前嘅馬明，望住好朋友喺度喊！


去到噚晚嗰集，何遠東嘅老婆好想知道佢嘅去向，於是托馬明去招魂，最初何遠東唔知道自己已經死咗，當佢知道自己已經離開咗之後，好愕然咁喊咗出嚟，喺呢一刻，何遠東仲記掛係佢嘅屋企人，於是馬明話希望佢可以同屋企人講再見！


喺見老婆之前，何遠東先去咗搵趙永洪，嗰陣趙永洪差啲撞車，何遠東仲救咗佢，喺隔空交談裡面，何遠東叫佢要好好做人，趙永洪亦慢慢釋懷咗件事，決定為好友努力做人。跟住何遠東返咗屋企，同老婆黃穎君在夢中交代後事時，老婆叮囑佢安心上路，何遠東就叫佢好好照顧一對仔女，如果遇到一個好男人就再結婚。最後佢見埋一班的士好友道別，睇到何遠東嗰種難捨難嘅感覺，真係睇見到好心酸！


結果網民好快喺fb洗版，個個都讚呢場戲做得好好，有啲人話比馬明同小儀、金剛嗰段更加催淚，仲話大台應俾多啲機會佢哋發揮！


今集留名等睇「降魔俠」——馬國明變身！



馬明用神力召何遠東嘅魂！(電視畫面截圖)最初何遠東唔知自己死咗。(電視畫面截圖)何遠東同趙永洪隔空傾偈，令到對釋懷。(電視畫面截圖)
何遠東返屋企同老婆道別！(電視畫面截圖)(電視畫面截圖)唔少網民覺得大台應該俾多啲機會何遠東。(電視畫面截圖)
(電視畫面截圖)唔少網民喺留言讚何遠東。(fb截圖)