王書麒今日喺柴灣擔任ViuTV節目《晚吹--總有一瓣喺左近》嘅嘉賓，跟主持人潘紹聰、關寶慧同岑樂怡大談登台時遇到嘅靈異事件，書麒話經常同太太許秋怡到外地登台，就算遇到靈異事都唔怕，只要有秋怡喺身邊就得，不過有次佢真係俾秋怡嚇窒咗，書麒話：「有次去酒店，嗰間房得兩張單人床，佢就挨牆瞓，瞓瞓下佢尖叫大嗌，佢話『有個男人黑色影企喺你床尾，仲要黐牆行，我咪一腳撐佢落嚟囉！』我冇誇張，佢從來都唔驚，因為佢覺得問心無愧，行得正企得正。」
而關寶慧就話有次去劉玉翠嘅西貢屋企打牌，由贏錢變輸清光，佢話：「見到嘢之後，舖舖都係我出沖，大家都估到。」係咪冇着紅色內褲邪一邪﹖佢笑住話：「乜都試過晒，冇用架，佢間屋有嘢，佢日日病㗎，佢樓下係另一個藝人住，間屋都係有嘢，佢哋輪流見，不過佢哋都搬咗。」
對於方逸華病逝，關寶慧話：「好耐之前台慶見過，握過手，我都唔知佢病，都幾突然。」
