今屆台灣金馬獎主席張艾嘉喺入圍酒會中，佢執導嘅《相愛相親》攞到伯爵年度優秀獎，張艾嘉親自上台攞獎。
問到張艾嘉覺唔覺近年少咗香港電影入圍金馬？佢話拍電影都需要時間，可能每一年都會唔同，今年少啲、明年多啲咁，再問佢會唔會拍番港片，張艾嘉話：「其實近年都冇人搵我拍港片，如果有需要，又啱的話都會諗吓。」
另外，被提及導演許鞍華（Ann）憑《明月幾時有》角逐最佳導演，可能有機會第4次問鼎獎項時，張艾嘉話Ann「Anytime都可以拿」，似乎對對方信心十足。張艾嘉又話自己同Ann成日見面，大家會傾吓合作拍新戲，不過暫時未有計劃落實，Ann就話合作需要一個劇本。張艾嘉話自己同Ann識咗40幾年，喺香港時成日私下約見面，去食吓嘢咁，Ann仲爆上次約張艾嘉去食海鮮，搞到胃痛，佢又讚張艾嘉對電影貢獻大，唔只導演，其他方面都做得好好，互笠高帽。
 （攝影：仇志德） |  《相愛相親》奪伯爵年度優秀獎 |  《相愛相親》團隊上台一起分享喜悅 |
 Ann話同張艾嘉喺香港有約見面 |
