黃翠如喜歡收仙人掌 蕭正楠戒指都慳番

2017-11-25

今日黃翠如同蕭正楠拍住拖，到沙田新城市廣場一期出席亮燈儀式，一身粉紅襯到絕，但係啲對話就好暴力。

活動上，聖誕老人送咗花俾翠如，但翠如話現實生活唔鍾意收花：「我收盆栽。」真係？蕭正楠就話：「係呀，我送好多仙人掌俾佢0架，哈哈哈！真0架！佢唔收花0架。」兩人一齊大笑。點解送仙人掌？蕭正楠衝口而出：「襟呀嘛！好似佢（指女友）咁，襟呀！又唔理話好理佢。」黃翠如即又謂：「多謝你咁讚我呀！」蕭就兜番：「幾難得嘅女仔唔收花，我都俾佢吸引到。咁仲好啦，唔使每年情人節同人爭花。慳好多呀！」

之前蕭正楠拍節目，俾Do姐鄭裕玲叫佢買戒指俾翠如，結果呢？「隻戒指我儲緊，Do姐指嗰隻係百幾萬嘅，等我儲下錢先。」唔驚俾人買咗咩？蕭正楠好老定咁話：「我知佢唔係一個咁緊張呢啲價錢嘅人嚟嘅…」黃翠如又作勢想打佢，然後話：「係呀，我係襟同埋抵囉！仙人掌一樣，我優點嚟嘅。」蕭正楠接口道：「Selling point嚟嘅。」