兄弟姊妹團男女大兜亂 陳凱琳迫新郎扮Sailor Moon

2017-11-26

陳嘉寶（Anjaylia）同半億闊少黃頌祈今日結婚，黃頌祈係長洲人，Anjay都依足傳統坐大紅花轎出嫁。雖然今日撞正《TVB馬來西亞星光萃頒獎禮》，唔少好少都缺席婚宴，但仍邀請到圈中好友陳凱琳、陳瀅、蔡穎恩、組合Super Girls成員吳嘉熙（Cheronna）等組成索爆姊妹團！

姊妹團由10女2男組成，與兄弟團嘅10男2女，相映成趣。一對新人與眾兄弟姊妹一齊坐
遊艇入長洲，見姊妹們均穿上同一款嘅粉紅色露肩姊妹長裙加頭戴花環，簡樸清新，不過今日天氣有啲凍，佢哋喺室外時都披上外套保暖。

而入長洲前，新郎率兄弟們到洲際接新娘，據聞都玩得好癲，每個兄弟要先飲一杯welcome drink，係一杯難飲不知名飲料，味道酸酸哋，又有錬奶溝啫哩喺當中，姊妹們又考新朗黃頌祈體力，要新朗同兄弟一齊做掌上壓，跟住再cosplay美少女戰，事緣新娘Anjay超鍾意Sailor Moon，新郎孖兄弟易服後仲要做Sailor Moon變身甫士，兄弟們答問題時又要被掹腳毛，玩完一大輪就奉上開門大利是過關，成功接咗新娘。