有近10年冇喺香港拍劇嘅陳啟泰(Ken)，主力做主持、司儀，佢喺13年離開亞視之後，回復自由身，索性還原基本步，北上拍戲兼登台唱吓歌，做一啲自己想做嘅事！早前Ken接受《蘋果》訪問曾經講過：「其實o依家呢個係最真實嘅我，以前簽得電視台，要做番佢哋要求嘅嘢，但係o依家出得嚟接戲，基本上只要角色有發揮同好玩，同邊間電視台合作都冇所謂，o依家變咗做中坑，咪做番啲中坑，又或者未過嘅嘢！」(新聞連結：http://bit.ly/2AY8oqC)
呢個忠於自己嘅中坑，果然係言出必行，Ken啱啱喺大陸拍咗套《瘋人院》，喺戲面大反派，最近又應ViuTV嘅邀請，除咗主持節目之外，仲同王宗堯、陸駿光合作拍新劇《Plan B》，今次佢唔再做專業人士，改為做黑社會大佬，為咗突顯個角色，佢同走去留鬚兼唔戴眼鏡！
Ken日前同王宗堯仲有陸駿光等人，喺元朗一間酒樓開工，嗰日係拍一場類似講數嘅戲，雖然導演只係一個80後，不過佢喺現場對住呢班前輩，一啲都冇怯場！現場仲見到Ken一隻手拎住條玉頸鍊，另一隻手揸住杯紅酒，喺田啟文身邊行過，再望住王宗堯俾人搜身，佢嘅眼神望落都好陰沉。
講到拍攝情況，Ken話：「其實之前同導演傾過，呢個角色有兩個恐佈位，一個位係殺人，另一個位係諗計害人，對我嚟講係一個大挑戰，所以我咪諗啲位做到表裡不一，表面上可能會成日同人傾計，又會教吓你啲嘢，但係實際上內心做嘅行為又係另一套，係一個殺人唔眨眼嘅人！」佢仲話：「香港冇拍劇已經近10年，我當然希望可以拍啲香港劇，但係做演員係好被動，近年只係喺大陸拍劇，遲啲又會返大陸拍網劇，今次好大機會又係做壞人。」
同場嘅陸駿光亦咗角色走去染白啲頭髮，佢話：「今次我係做一個劏屍嘅人，成個角色都好陰沉，有一場話我連前度女友都會劏埋！」雖然今次佢同唔少新演員有對手戲，但係睇得出大家好有嗰團火，亦好有潛質，好似有一場講陸駿光摑駱振偉，夾夾埋埋打咗佢15、16巴，駱振偉話自己塊面都有損，佢仲話：「拍完第二日，陸駿光send咗短訊慰問，仲好長氣咁講完又講！」
 陳啟泰專登為角色設計陰暗面。 |  |  Ken今次個形象同佢以往好唔同 |
 |  喺新劇中，Ken同王宗堯有對手戲，同場仲有田啟文。 |  陸駿光為咗拍新劇，特登染白啲頭髮。 |
