劉德華今日喺中環置地廣場為願望成真基金聖誕慈善義賣活動「分享願望的喜樂2017」擔活動大使及主禮嘉賓，華仔喺台上同大家分享童年願望，曾經患病嘅願望童焜皓送上自畫圖畫，而另一個願望童嘉鎂就送咗手製曲奇，仲親手餵華仔食，司儀問到華仔會唔會想開餅店，佢話：「我真係諗過，會平啲租鋪俾我。」
華仔再一次表示聖誕願望係出年開個唱，聖誕節就唔會扮聖誕老人，但是會同囡囡一齊喺屋企佈置。被問到係唔係諗過開甜品鋪，佢話：「真係有諗過，我依家食齋，甜品我都ok，不過唔可以太甜，蝴蝶酥、曲奇餅都幾鍾意食。」華仔表示最拿手係整蛋糕，佢話：「識整好多年，好多人食過，《九一神鵰》已經開始整，自己個女每年生日蛋糕都係我整，無論邊個人送幾靚，我都會整，雖然都係整海綿蛋糕，但係每年都有啲唔同，個女食唔哂，啲賓客都會食哂，都幾受歡迎。」
華仔近年開始食齋，問佢會唔會想寫食譜，佢話：「有鑽研下齋菜，整食譜，教人就未必得，可以諗下12道齋菜或者12道『嘩』品，係口字邊個華。」
 (攝影：陳慧安) |  |  華仔再一次表示聖誕願望係出年開個唱 |
 |  華仔表示最拿手係整蛋糕 |
