屆50歲嘅胡渭康，將於明年2月喺旺角麥花臣場館舉行入行35週年演唱會，暫時只演一場，佢日前喺銅鑼灣接受訪問，現時加緊操練，想將空中瑜伽搬上舞台，又揭多年來防腐康保持不老之說。
雖暫演一場，胡渭康覺得做騷一場同十場無異，無謂令自己增添壓力，沒有理會銷情。今次開騷係老闆林建名親身搵場地，佢提議喺麥花臣搞騷，令胡渭康開心到不得了。歌曲方面已經準備好，胡渭康話：「新舊歌都會唱，我啲觀眾十幾歲至八十歲，橫跨幾個年代 ，《伴我啟航 》、《黃金戰士 》經典歌曲走唔甩，會諗下改少少演繹，有時睇番同業人開騷，見佢哋將自己歌改頭換面就冇咗陣除，我覺得可以樂器上、聲音加一啲小元素，但煎皮拆骨就唔得，唔通《上海灘》變咗爵士樂咩。」
胡渭康為演唱會亦加緊操fit，健身之餘仲玩空中瑜伽，想將瑜伽概念帶上舞台，不過因場地涉及好多問題，包括保安、保險、消防等等，現時了解之中，佢仲話：「玩咗瑜伽之後柔韌度高咗好多，但自己高度有時都影響咗，玩嘅時候會撞頂。」雖然操到一身肌，但到時唔知會唔會驚喜一脫 ，仲講笑：「又或者除褲呢 ，安全個除衫， 點都有條底褲喺度。」
無論外型體態胡渭康咁多年都保持得宜，現時一星期有四日運動，佢話：「除咗運動要有均衡飲食，我會甩糖，屋企煮嘢唔放調味，大家可以利用多啲天然嘅材料去煮食，例如檸檬、醋、香葉等等。」防腐康稱號就係咁練成，真係成功雖苦幹，胡渭康冇沾沾自喜，覺得係自己辛苦經營番嚟嘅成績，每當被人讚時候全部接收。
 胡渭康明年會舉行入行35週年演唱會。 |  佢話想將空中瑜伽搬上舞台。 |  講到防腐心得，佢話可以利用多啲天然嘅材料去煮食。 |
