姚子羚今日喺銅鑼灣出席遊戲活動，佢透露入行後已經少咗打機，怕自己太沉迷，玩到唔瞓覺，佢話：「以前試過打咗10幾個鐘頭，有時仲會校埋鬧鐘起身玩，連奧運、世界盃都會捱眼瞓睇。」佢又指男友唔打機，反而會一齊睇戲。
講到佢喺馬來西亞頒獎典禮上，獲「最喜愛TVB女配角」時公開多謝男友鄭子邦，子羚話：「佢（男友）覺得我好真誠，好感動，話我大個女，成熟咗，我諗佢都冇諗過我喺公開場合咁衷心多謝佢。」係咪嫁得喇？佢笑住話：「咁又唔係，大家都知道，特別係今次，感受到我好多謝佢，佢令到我喺人生上對某一啲嘅睇法唔同咗。」
