剛於台灣金馬獎獎奪得影后嘅惠英紅，並未有放慢手腳，最近佢就同姜皓文(黑仔)，拍攝本屆「鮮浪潮」電影節最佳導演李駿碩首次執導嘅電影《翠絲》。電影講變性人「翠絲」由發現自我到身心上正式由男變女的過程，而翠絲一角就由剛喺馬來西亞國際電影人年展首奪最佳男配角嘅黑仔飾演。


對於首演變性人，黑仔話：「呢個絕對係我從影生涯其中一個最大挑戰同突破，自己事前都做足功課，為呢個角色做足身、心上嘅準備，係有啲心理關口要突破嘅！」戲中佢同小紅姐演一對夫婦，名符其實嘅「黑紅配」，黑仔坦言：「梗係興奮啦！紅姐一向咁好戲，仲要係今屆出爐金馬影后，我感到榮幸之餘，亦都希望我地今次合作可以擦出火花！」


而小紅姐就話：「呢個係一個好窩心嘅劇組，好開心有呢一個驚喜。我希望可以將我拎金馬影后呢個旺氣帶到落呢部戲啦！」開鏡當日，劇組亦好窩心咁送咗鮮花及心意咭俾小紅姐，祝賀佢成為金馬影后。





(電影《翠絲》劇照)(電影《翠絲》劇照)黑仔同小紅姐出席拜神儀式。
劇組送上鮮花同咭賀小紅姐奪金馬影后。