今日電影《告別之前》喺圓方舉行優先場，張繼聰、衛詩雅、談善言、李靖筠及羅蘭姐都有嚟撐場。
張繼聰同衛詩雅喺戲中飾演一對夫婦，戲中兩人仲有一位小朋友，講到今次拍戲，張繼聰就話：「因為要就番小朋友嘅聖誕假，我拍到心臟病發咁滯，呢套戲又好慘，我自己都盡力忍住唔喊，拍過之後都幾驚，套戲講生離死別，都幾深重。」
衛詩雅就話：「阿聰知道我冇小朋友，所以邀請咗我去佢屋企俾我感受下同小朋友相處，咩係父愛啊，懷孕嘅情況係點啊，當時阿Kay大住肚，好多謝佢哋教咗我好多嘢，阿聰拍喜劇好犀利，但係原來拍悲劇都好勁，係一個好演員。」
張繼聰話：「老婆當時都喺屋企同詩雅分享，仲一齊送佢返屋企，今次拍完大家都有保持聯絡。」講到阿Kay今日正式復出，張繼聰話：「佢冇唔慣，不過比預計中早咗復出，我好佩服佢，佢o依家跟我個教練健身，以前我去做gym佢就一定返屋企先，o依家會自己走去舉鐵，仲叫埋我去，o依家仲健康同fit過以前啊。」今日阿Kay投訴寶貝囡淨係識叫爸爸，唔識叫媽媽，阿聰笑笑口話：「佢有咁嘅訴求咁我返屋企即刻訓練下個女。」
 （攝影：張俊銘） |  今日電影《告別之前》喺圓方舉行優先場，張繼聰、衛詩雅、談善言、李靖筠及羅蘭姐都有嚟撐場。 |  張繼聰同衛詩雅喺戲中飾演一對夫婦。 |
 衛詩雅話：「阿聰知道我冇小朋友，所以邀請咗我去佢屋企俾我感受下同小朋友相處。」 |  阿Kay投訴寶貝囡淨係識叫爸爸，唔識叫媽媽，阿聰笑笑口話：「佢有咁嘅訴求咁我返屋企即刻訓練下個女。」 |
