韓國36歲女神全智賢同老公崔俊赫於2012年結婚，去年2月誕下慈姑椗，今年6月女神宣佈再度懷孕，預產期喺下個月。
而現時懷有約8個月身孕的全智賢雖然停晒工作，不過佢同老公都好識享受。上周全智賢挺住大肚孖老公秘密來港，上周五已經被網民喺中環捕獲行街，網民喺微博公開全智賢跟老公現身中環嘅背影照，留言指全智賢素顏都咁靚，當日全智賢跟老公都冇戴口罩，不過就戴上帽遮樣。當日大肚嘅全智賢以全黑造型配波鞋示人，手腳望落仲係好纖瘦，全智賢更蹺實老公，非常恩愛。
原來此行全智賢唔止去咗中環，佢仲同老公去咗西貢食海鮮，讀者林小姐透過《蘋果》爆相爆片，目擊上周四全智賢與老公聯同一男一女友人去到西貢嘅全記海鮮擦海鮮，林小姐指當日見到疑似全智賢與同行友人以韓文傾談，起先佢同先生都猜測對方是否全智賢，事關疑似全智賢素顏示人，加上着住便服兼束起頭髮，令到林小姐一度唔確定係唔係全智賢。
林小姐表示當時佢看到同行男子與全智賢老公十分相似，故即上網查證崔俊赫嘅樣子，發現與眼前人一模一樣，再看到疑似全智賢嘅鼻上有粒癦後，林小姐就更加確認眼前人正正係全智賢。林小姐話全智賢可能身在海外關係，所以冇話好警惕，全程都表現自然，同一對男女友人有講有笑。而全智賢佢哋一行四人仲好貼地，未有要求坐房或者有冷氣位置，反而與普通市民一樣就咁坐喺出面嘅位置，好平民化。
而本報前晚到店內向職員查問全智賢等人上周是否有來用謄時，佢哋都表示唔清楚同唔知道。
另外，全智賢同老公似乎已結束香港之旅返回韓國，噚日有韓國網民就上載全智賢同老公喺下午時去咗一間西餐廳食飯，只見全智賢剪短了頭髮，並用一條頭巾束起頭髮，而佢似乎怕冷親，即使入到室內都着住厚厚嘅羽絨褸，反而佢老公就將羽絨褸除下。
 |  全智賢同老公以及一對男友上周四去咗西貢食海鮮 |  全智賢老公崔俊赫陪老婆玩 |
 攝影：羅德光 |  讀者指當日全智賢等人坐出面嘅位置 |  噚日有網民指見到全智賢夫婦喺首爾撐枱腳 |
 全智賢似乎怕冷親，喺室內都着住褸 |  全智賢同老公結婚多年仍然好恩愛 |  崔俊赫 |
