金馬影后惠英紅今日接受《蘋果》專訪，講到《血觀音》，有觀眾看後稱覺得故事頗複雜，而小紅姐就認為該片其實是反映了社會好真實的一面。


「社會點會完美？只係啲人避談啲唔完美、陰暗面，呢部戲係全部唔講正面，只係講真實嘅負面嘢。」每場戲都落足功夫，每一場都深愛，但特別喜歡，就是拜神一場。「嗰場係臨拍之前兩三日，我有另外嘅idea，捉咗導演研究。我想用一個好靜態嘅方法去演，令到反差好大，面對菩薩，你做殺人嘅事，心寒感大好多。我搵番我平時唸開嘅經文，特別搵咗往生經，因為斬草除根之後，佢始終都係我個女，我都想佢一路好走。所以呢個安排之下，棠夫人更加冇血性。呢場戲只係一take。你哋睇戲嘅時候會睇到幾場穿插，其實成場一個人自己安排點樣去做，由開始唸經，等待消息，知道殺咗個女，開始心痛，個女死咗，但殺咗一個阻擋我嘅人，再冇人揭發我任何嘢，就好似好安樂。成場都係自己咁樣做。個轉變有五六個情緒喺裏面。有時情緒到，你話叫眼淚唔好流落嚟，但真正喊緊，我又控制到第一滴眼淚係真係為個女死而落，我都覺得自己越來越進步。」小紅姐憶述拍攝嘅點滴。


「另一場ending我都好鍾意，導演係鎖住我，完全唔郁得，係講呢個人，同培養到個魔鬼、比自己仲犀利一百倍，你係驚呢個人，想死又死唔去。你唔可以就咁瞓喺度過咗呢個ending，所以我最終用咗一個聲音演繹，同埋用瞳孔表達嗰種慌忙，好驚，想死又唔死得，要生又唔好好地生。我唔想搶咗個女嘅毒，佢仲毒得緊要過我，我又唔想搶佢，但我又變咗半個植物人，出嚟個效果反而係幾好。好多人睇完出嚟話好驚好寒，就係想用呢個方法令觀眾覺得好驚，好恐怖，『好驚呀女人係咁，你真係抵死呀！』但你又唔郁得，只可用呢樣嘢嚟做。我最終諗到呢個方法，我覺得自己都幾叻。」惠英紅笑言。



攝影：林德雄惠英紅今日接受專訪，講到拍攝《血觀音》嘅點滴。