方中信、鄭嘉穎、朱潔儀、鄧鉅明伉儷、蔡志明伉儷及家人等今晚出席保良局假會展舉行嘅慈善晚宴。
方中信今年中為手錶品牌到廣州宣傳時，硬食女子強抱後，又突然被品牌宣佈終止其代言人身份，並刊聲明指影響品牌形象及聲譽。不足兩星期後，方中信同品牌「復合」續約，表示之前只係有溝通誤會。（新聞連結：http://bit.ly/2BQDqBn
）
不過衰氣似乎未完，上月底方中信被一間德國公司入禀法院追討百多萬（新聞連結：http://bit.ly/2AeC2L9），今晚被問及事件時，方中信表示有師傅指佢今年犯太歲運氣差，估唔到真係應驗，佢話：「黑到唔信，撞咗兩次車，整單代言人嘢，頭先揸車返屋企為避野豬，差啲撞到隔籬部車，我嚟緊唔接任何工作，捱埋呢廿幾日，同家人去日本旅行。」佢話當日被記者call爆電話問官司一事，由於要收長途電話費，最後要拔埋SIM卡，翌日就收到律師信，交由律師處理，不便透露詳情。
另外方中信喺吳君如新劇《妖妖鈴》嘅地中海造型非常搶鏡，佢話試造型時覺得好玩，但經過連續40晚夜班兼戴頭套焗到標汗水，甚至令頸生瘡，現時已經怕怕。
賴慰玲日前產子Marat，陳凱琳搶先貼相報喜話做咗契媽，而契爺嘉穎今日就話好鍾意小朋友，過去十幾年間助養唔少小孩，講到抱住Marat時一臉慈父樣，嘉穎即甜笑：「契仔得意，幾開心，睇住佢哋拍拖、結婚到生仔，希望Marat長大成人會好man。」當問到有冇打算快啲生番個BB陪契仔成長，嘉穎就話每人時間表都唔同，有當然歡迎，但一步一步嚟。
 上月底方中信被一間德國公司入禀法院追討百多萬，佢今日都話好黑。 |  捱多廿幾日去旅行，等過年轉運。 |  方中信今年撞過兩次車，但最麻煩嘅事可能係呢單代言人事件。（微博圖片） |
 最後方中信同品牌和解再續約。 |  嘉穎希望契仔Marat長大成人會好man。 |
