以前單身冇所謂 馬國明話會顧心穎BB感受

2017-12-10

為拍《為食神探》而撻着嘅馬國明同黃心穎，雖然佢哋異口同聲話o依家相處得好舒服，大家係了解中，如果將來公開感情事，只會係結婚或分手。

之不過即使佢哋唔肯承認戀情，但係關係逐漸浮面，身邊嘅人都明白係乜嘢嘅一回事，講到同心穎嘅相處，今日有周刊報道，馬明就話覺得心穎嘅性格好爽朗，唔係難服侍嘅女人，相處之後覺得心穎嘅性格好吸引佢，雖然本身馬明唔係一個鍾意講嘢嘅人，不過心穎本身好多嘢講，而且又好多古靈精怪嘅主意，所以馬明承認自己都變得開朗咗，仲比以前多咗嘢講。

報道仲話馬明承認自己比較悶，不過喺啲特別日子，佢都會花吓心思，好似如果心穎話有啲嘢好似冇對佢做過，馬明會先扮作若無其事，留番喺適當嘅時候先去表現，佢又話以前單身一個冇所謂，不過o依家會以顧及佢感受為先。之後又講到結婚，馬明覺得o依家仲係了解中，而且心穎仲好後生，所以佢都希望可以俾時間大家發展事業，況且如果係啱時間，自然會發生。

至於見家長方面，馬明話因為大家工作好忙，暫時未安排到時間，不過媽咪對心穎嘅印象都好好，如果真係有時間嘅話，馬明都好希望可以安排一下去旅行。另一方面，心穎亦讚馬明為人好好，好簡單，雖然佢表面好多嘢都冇所謂，不過呢樣唔代表佢冇努力，只係佢唔著重得失，O依家大家都認真去了解同相處。