夏雨、李司棋、黃翠如、陳敏之、岑麗香等今日喺馬鞍山出席《溏心風暴3》宣傳，翠如早前被男友蕭正楠彈廚藝差，翠如一副谷氣樣話﹕「我會保留追究權利！」


翠如否認自己係「地獄廚神」，笑住鬧男友﹕「佢死梗啦，我等陣會打電話鬧佢，係佢自己對食要求太高。我只係煎爆過一次雞蛋，因為唔熟個鑊，廚具用熟啲會比較好。」翠如話煮一餐普通飯冇乜問題，蒸魚都OK，問係咪每晚收工都會煮畀男友食？佢話﹕「我都唔係日日見到佢。」翠如話妹妹最近開咗間臨時餐廳賣煎魚，有時間都會去學吓嘢，問係咪要上廚藝班？佢話﹕「以前都做過飲食節目，今次係阿蕭誹謗我。」


另外，聖誕節將至，翠如話因為男友要拍劇，所以未能一齊慶祝，問到會否趁空探訪助養小朋友？佢話﹕「有諗過，不過今年聖誕節未必能成行，始終要多方面配合。」



陳敏之、莊思敏同岑麗香今日一齊宣傳《溏心3》。夏雨覺得非法網站下載睇劇，會影響收視。