古巨基、劉兆銘、郭秀雲今日喺油麻地，為倪震同周慧敏(Vivian)嘅新桌球室開幕擔任嘉賓，現場有一張喺外國引入嘅圓形花式波枱，即場由基仔同Vivian示範開球禮兼友誼賽，結果由古巨基勝出。開球前佢哋先嚟一場口水戰，基仔話要同Vivian要賭啤酒，倪震就即刻衝出嚟話：「我太太唔飲酒，等我嚟頂。」基仔笑話：「真係為愛而戰。」同時基仔又冧老婆話：「打波嘅時候，全靠望一望老婆，個人即刻溫柔咗，所以打到。」
完成口水戰後，眾人到樓上一個婚宴場地繼續影相，現場以一張倪震同Vivian當年嘅結婚相做背景，當嘉賓們要求倪震同Vivian擺番同一個pose影相，佢哋就拒絕，倪震話：「希望結婚十週年後再返嚟呢度慶祝。」
而倪震同Vivian受訪時就話，嚟緊1月5號就係佢哋結婚九週年，倪震稱希望十週年時請多啲朋友慶祝吓，咁會唔會影輯全新結婚相？倪震表示：「大家都知我離開咗演藝圈一段時間，對住鏡頭比較生硬，唔再係我強項。」Vivian話接落嚟都要為演唱會排練：「因為廿幾號就要表演，所以當日需要練習，同埋我哋平時好少喺特別節日要慶祝，反而平時會俾小驚喜大家。」問到演唱會時倪震會唔會送驚喜？佢話：「演唱會就要問總監，古巨基話事。」
基仔受訪時候表示，希望到時倪震喺演唱會真係上台：「起碼都要唱歌啦。」會唔會叫倪震或Vivian着番最出名嗰套宮廷裝？基仔話：「其實大家都好喜歡Vivian呢個造型，開會時我有遊說過佢，佢反應係唔抗拒嘅，我都係為大家謀福利，應該問題不大。」
咁仲有安排咗啲咩俾Vivian？佢笑言：「可能係安排咗叫Vivian喺空中吊嚟吊去。」基仔仲話：「因為今次係30週年，好想帶到啲驚喜畀樂迷。」作為總監嘅基仔有冇要Vivian地獄式訓練？佢話：「我主要負責構思，佢自己都好緊張，早喺半年前已經自己地獄式訓練緊，而且今次嘅跳舞環節比較多，總之希望樂迷開心 。」
 古巨基、劉兆銘、郭秀雲今日喺油麻地，為倪震同周慧敏(Vivian)嘅新桌球室開幕擔任嘉賓。 |  |  現場有一張喺外國引入嘅圓形花式波枱，即場由基仔同Vivian示範開球禮兼友誼賽。 |
 |  倪震同Vivian受訪時就話，嚟緊1月5號就係佢哋結婚九週年，倪震稱希望十週年時請多啲朋友慶祝吓。 |  |
