高海寧(高ling)同龔嘉欣今日現身寶琳，炮製特色便當及健康飲品賀聖誕，抱病出席嘅高ling身穿闊領裙，當彎腰炮製食物時令到景觀好有睇頭，而嘉欣就騷纖腰表演單手剝蕉皮，各施各法令場邊鎂光燈閃唔完。
高ling感冒未清，今晚仲要通宵拍淋雨戲，問到男友鄧智偉有冇照顧佢？佢大方坦言：「有嘅。」臨近聖誕，問到佢會唔會同男友甜蜜一下互送禮物，高ling就話自己覺得未必需要互相交換禮物，只要兩個人開心，每日都可以係聖誕節、情人節，高ling仲話男友未曾試過佢嘅手勢，反而男友每次都煮唔同嘅菜式，當中最好味係鼓油雞，問到是咪已經被男友鎖住個胃走唔甩？佢甜笑表示：「暫時覺得幾好，希望維持到。」
日前生日都仲要開工嘅嘉欣，獲黃心穎送上三巴掌當禮物，因為當晚廠景拍心穎摑佢嘅戲份，每打完一巴，心穎都好唔好意思講句「生日快樂！」另外生日當日又收到契細佬吳業坤傳短訊指自己係正印女友，嘉欣笑言：「好奇怪，佢唔係我杯茶，我怕姊弟戀。」另外嘉欣臨時得知聖誕有三日假期，可惜冇人約，她表示如果冇人約就一個人飛，離開香港呢個孤單之地。
 攝影：仇志德 |  高ling同龔嘉欣今日現身寶琳，炮製特色便當及健康飲品賀聖誕。 |  |
 高ling感冒未清，今晚仲要通宵拍淋雨戲，認真慘豬。 |  高Ling聚精匯神咁整嘢食。 |  日前生日都仲要開工嘅嘉欣，獲黃心穎送上三巴掌當禮物。 |
 嘉欣臨時得知聖誕有三日假期，可惜冇人約。 |
