陳豪自家咖啡品牌blooms最近喺銅鑼灣設立Pop-up Store，噚晚佢現身店舖做星級店長，親自用巴西、印尼、哥倫比亞、埃塞俄比亞，呢幾個地方嘅咖啡豆，混合而製成一杯咖啡，請現場傳媒品嚐，陳豪話：「我鍾意咖啡，但為人低調，演藝事業同做咖啡都一樣咁低調，可能年紀大咗，概念有變，近期開始同大家喺facebook分享好多嘢，玩咗兩個禮拜。」


第一次開Pop-up Store，陳豪自稱逢五、六、日，有九成時間都喺舖頭坐陣，佢話：「想講人知，我唔係掛名，我喺現場會親自入豆、烘焙同設計品味，今次試水溫，之前喺荃灣開咖啡工場，已經有九個月，都係幫人做生意，希望遲啲自己開間實體店，o依家搵緊舖，好多人支持我，暫時未知邊區開。」


陳豪仲話做生意係步步為營，作為藝人遲咗兼係最慢開facebook做宣傳：「學識呃like，受太太(陳茵媺)感染，收埋自己咁耐，係時候要醒。」另外，講到二仔要搵幼稚園，陳豪話：「搵緊，希望可以同大仔同一間幼稚園，其實邊間都好，適合小朋友性格更重要。我都似普通家長一樣要排隊，手續過程一樣，人人平等，我哋教仔女都係一樣。」




攝影：陳俊強陳豪噚晚現身佢開嘅咖啡Pop-up Store，親自整咖啡招呼傳媒。陳豪自稱逢五、六、日，有九成時間都喺舖頭坐陣