新亞視舉行開台記者會，電視圈再起風雲，ViuTV亦喺今日公告奪得港台兩大音樂頒獎禮嘅播映權，包括轉播明年1月1日舉行嘅「2017年度叱咤樂壇流行榜頒獎典禮」及直播1月20日舉行嘅「第十三屆KKBOX風雲榜」，向一台獨大嘅無綫挑機。
近十幾年樂壇都係陳奕迅（Eason）同容祖兒嘅天下，佢哋年年攞獎攞到手軟，但今年Eason只推出一張國語碟，祖兒亦只出一張演唱會專輯，佢哋都事先張揚今年唔會出席頒獎禮；依照目前播放率走勢，一向唔係商台那杯茶嘅李克勤，今年卻破天荒喺903擁有3首冠軍歌，有機奪得入行30年首個叱咤男歌手金獎，一雪前恥！
至於叱咤女歌手方面，出道13年嘅衛蘭（Janice），同樣有好大機會處女封金，今年Janice有6首歌打入叱咤榜，其中2首係冠軍歌，如無意外，應該會接祖兒捧，首嚐金獎滋味。
