日本天后安室奈美惠將於明年9月引退演藝界，其精選碟《Finally》大賣逾182萬張，成為本年度最暢銷唱片，亦係oricon自2010年以來再有大碟能突破150萬銷量。


安室奈美惠將展開巡迴演唱會「namie amuro Final Tour 2018 ~Finally~」，由於反應熱烈，日本方面宣佈15場巨蛋騷加開福岡及札幌兩場個唱，如今日本巡唱已加至17場，估計有75萬觀眾捧場，打破殿堂級歌手小田和正創下74萬巡演觀眾之紀錄，而安室今次巡演嘅亞洲站亦到深圳、香港同台灣舉行，佢會先喺3月17、18日到深圳灣體育中心展開兩場演出，香港站定於3月31日喺紅館，台北兩場就會於5月19、20日喺台北小巨蛋舉行，呢五場預計有5萬海外歌迷捧場，令安室最後巡唱合共達80萬觀眾，成為日本史上有最多入場觀眾嘅個人歌手巡演。


日本NHK電視台一直力邀安室最後一次出席除夕晚舉行嘅《紅白歌唱大賽》，今日終證實安室會亮相《紅白》，到時會以特別出場歌手之身份參與盛會，係佢相隔14年亦係最後一次現身《紅白》。


另外，雜誌《女性自身》拍得安室日前出入診所，呢間診所出名醫治喉嚨及聲帶，相信安室只係為保養聲帶到到該處求醫，連濱崎步、倖田來未等歌手都係常客。