近聖誕節，個個party都話要交換禮物，應該都使咗唔少錢，荷包有出冇入點算好？如果可以好似阿叻陳百祥同王晶咁有隻馬，就可以回到本喇。
今日喺沙田馬場舉行今年最後一次日賽，陳百祥同王晶隻團體馬「太陽旺旺」，喺第八場賽事跑頭馬，王晶、陳百祥同老婆黃杏秀有份拉頭馬，好友蘇志威同太太劉小慧都有份影大合照。
呢場頭馬獎金有746,700元，唔知夠買幾多份聖誕禮物呢？如果陳百祥有落注支持愛駒就更和味喇，因為獨贏最終有12倍，如果有眼光嘅買埋連贏就有19倍，呢個聖誕就fat fat喇。
而蘇志威名下嘅愛駒「駿王」，之前4次出戰，唔係包尾就尾二，輸得最多個次輸48.75馬位 ……呢次降落四班跑1400米，好有進步咁跑第六，入唔到前五名拎獎金，估計佢聖誕願望係希望愛駒再有進步喇。
 |  蘇老闆愛駒「駿王」有進步，差少少就可以拎前五名嘅獎金。 |  |
 團體馬「太陽旺旺」跑第一，阿叻同王晶有錢分。 |
