何雁詩、麥美恩及谷薇今日去到大圍美田商場，出席聖誕活動，何雁詩透露平安夜與男朋友鄭俊弘一齊食飯放狗，對於仲有冇為家中小狗戴倒鈎狗鏈，何雁詩話已經冇用，鄭俊弘仲送咗一隻戒指公仔畀隻狗，但係冇送畀佢，何雁詩話：「冇咁快，唔好嚇親我，我隻狗收好過我收，隻玩具戒指係俾佢攞嚟當公仔玩。」
何雁詩仲話今晚聖誕節，會同鄭俊弘同埋圈外朋友一齊慶祝，佢將為男友親自下廚，至於男朋友嘅廚藝，何雁詩話：「 佢偶像係鼎爺，不過我煮嘢都OK，我係一個賢妻。」何雁詩同鄭俊弘拍拖未夠一年，今年係二人首個聖誕節，佢話都係平平淡淡咁過，冇乜特別，放吓狗就已經好happy。
至於今日擔任司儀嘅麥美恩，表示好高興年尾好多搵錢工作，但係感情生活仍然空白，暫時處單身狀態，麥美恩話有人追求，但可能要畀啲耐性去了解，佢話：「希望搵個細心對象，不過現在工作為先。」
 （攝影：張俊銘） |  何雁詩話聖誕節都係平平淡淡咁過 |  何雁詩、谷微 |
 麥美恩話年尾好多搵錢job，但感情生活空白。 |
