今日係Boxing Day，好多人都會把握最後一日紅假，約friend子大玩特玩，不過，亦有人做孝順仔女，陪吓家中父母。
好似嫁入豪門嘅李嘉欣，平日都係湊仔許建彤（Jayden）多，間唔時仲會約家姐李嘉明去high tea飲茶，以為佢聖誕就多ball去？又未必嘅，李嘉欣今晚喺Instagram度貼出，係佢同老公許晉亨及老爺許世勳嘅3人合照，相中見到已經98歲嘅許世勳相當精神，仲好好笑容。
嘉欣留言「Happy hour」，睇嚟係孖埋老公亨亨及老爺去見面，由於囝囝Jayden冇入鏡，唔知佢有冇出席，但就見到「嘉亨」兩人勁好笑容，相信呢場「boxing tea」飲得好高興。
而嘉欣個friend鄭秀文（Sammi）亦有留言讚嘉欣，佢話：「Beautiful you!! Happy and blessed.」唔知係咪同Sammi個爹哋近日身體抱恙有關，所以佢見到嘉欣同老爺幅合照，特別有feel。好彩，Sammi都有喺自己個post度話佢爹哋睇完醫生已無大礙，佢仲落hashtag叫大家要多留意家中年長嘅父母㖭！
 （李嘉欣Instagram圖片） |  「嘉亨」約埋許世勳見面，享天倫樂。（李嘉欣Instagram圖片） |  Sammi透露爹哋身體近日有不適，幸好已及時獲得治療。（鄭秀文Instagram圖片） |
