文詠珊（Janice Man/JM）今日凌晨喺微博貼文透露，喺芬蘭轉機到聖彼得堡時，航空公司整唔見咗佢啲行李，但係向航空公司查詢時，只係換嚟一句「不清楚」，令JM嬲爆。
JM原定同金融才俊男友吳啟楠（Carl）趁聖誕去睇北極光，點知由芬蘭轉機去俄羅斯，5件行李冇晒，航空公司只係話no information，打去查詢又冇人聽電話，最慘係佢啲禦寒衣物同日常用品都喺晒篋入面，又買唔到，仲要凍病咗。唔見完行李又差啲被人偷嘢，JM此行可謂禍不單行。（新聞連結：http://bit.ly/2l2JG35
）
幾經轉折，5件行李終於返到JM懷抱，JM表示：「重逢了，好感動！」，仲影咗幅相V晒手咁，隔住個mon都感受到佢份開心。
JM接受《蘋果》訪問時透露：「到步咗芬蘭之後，搵番櫃檯職員幫忙，其實佢哋開頭唔係好知、又唔係好願意，好似想叫番我哋去行李嗰度自己問啦，我哋已經好勞氣，因為唔可能再咁樣，叫佢哋一定要負責任，唔可能你哋整唔見我啲嘢，仲要我自己去搵，因為我哋仲要趕飛機。然後我哋搵番啲行李，原封不動，其實應該喺個機場冇走過，但係冇人俾個交代我哋，亦冇人同我哋聯絡過。」
