無綫嘅萬千星輝頒獎典禮，將於明年1月21日舉行，視帝、視后之爭，當然又係大家最關注嘅重點，今日就有周刊報道指，唐詩詠就已經抛下感情事，全力去拉票，務求能做到網民心目中嘅「絕世好女友」之餘，亦希望一嘗視后嘅滋味。而報道中亦指，其前男友洪永城亦有為呢位前度拉票，為「復合」埋下伏線。


2017年，對於唐詩詠來講，可算是悲喜交集嘅一年，事業上，佢憑劇集《不懂撒嬌的女人》入面Cherry一角，入圍角逐大台頒獎禮嘅視后，同佢爭獎嘅仲有同劇嘅Mall姐宣萱，詩詠喺報道入面講到自已嘅愛情觀同劇入面嘅Cherry好相似，佢喺開拍前一個月亦已經完全投入角色，至於結婚，佢就話自己同Cherry都會好認真對待。能夠全程投入角色，順理成章，詩詠亦得到回報，得視后提名，亦已被網民選為心目中的視后。


對於被封為民選視后，詩詠接受周刊訪問時就話，呢個獎對佢嚟講係有一定意義同代表性，得到呢個獎之後，公司先公佈視后入圍名單，而得到民選視后後，就改變咗佢一啲諗法，覺得自己都應該落力去爭吓獎，應該要對自己有信心，雖然入圍嘅對手都好強勁，好似有宣萱、田蕊妮、胡定欣、李佳芯、黃翠如、李司棋同鮑起靜等等，所以詩詠覺得能同呢班好戲之人爭獎，已經係對自己有交代。而佢亦視《不懂》劇為代表作，所以先會落力拉票，唔想令大家失望喎！


事業得意，可惜今年詩詠嘅愛情並未如人意，今年5月佢宣佈同拍拖兩年嘅洪永城分手，報道中，詩詠亦罕有提到分手理由，佢認為「絕世好女友」令到另一半嘅壓力太大，所以將來拍拖都會學識點樣去保護對方，至於洪永城，詩詠就話分手只因步伐不一致，會唔會復合就要隨緣喇。




唐詩詠今年5月拍拖兩年嘅洪永城分手。(資料圖片)(資料圖片)之前二人都好甜蜜咁喺網上放閃。(資料圖片)
詩詠話視《不懂撒嬌的女人》為目前嘅代表作。(資料圖片)戲入面同王浩信演一對，令觀眾留下深刻印象。(資料圖片)(資料圖片)