經常被網民笑指「削骨還父」嘅胡鴻鈞，日前接受商台主持梁泰來訪問，大方談到呢個傳聞，其間更叫主持摸佢塊面驗證。


今年憑劇集《降魔的》角色「石敢當」人氣急升嘅胡鴻鈞，接受商台訪問時，講到入行7年，直認面對負評或緋聞均成長了不少。2010年，胡鴻鈞參加《超級巨聲2》後入行，3年後，有網民指佢嘅面形起咗變化，質疑「刀削面」整容。講到呢個敏感話題，胡鴻鈞即場效法Angelababy同范冰冰，叫主持人即場驗證，佢話：「你可以摸一吓，感受一吓。臉瘦咗，一來會少咗Baby Fat，二來，我做運動都一定有幫助。但其實拍劇上鏡時，你都會睇到面上嘅肥肉存在。或者係角度問題、又或者我的確會P圖。照片既然係要放上Media，就一定要調色、把自己弄得最瘦、眼睛弄得最大。」


胡鴻鈞直認入行初期因不喜歡網民攻擊他削面整容，而刪除部分負評，反而招來更多網民攻擊嘅結果，他直認自己當時極為幼稚：「我必須承認自己幼稚，嗰時我唔識點去面對，就選擇逃避。o依家回想，咁係錯嘅。正所謂『食得鹹魚抵得渴』，呢七年來，我學識唔會每個人都讚賞你，有時有啲人會唔喜歡你、會攻擊你。要學會怎樣去接受呢啲聲音，擁抱呢啲聲音。」


除咗整容，胡鴻鈞亦要面對斷背傳聞，佢話最搞笑係連坤哥(吳業坤)都係佢對象：「大家都應該清楚坤哥嘅Preference（性取向），佢咁多新聞都係同女性有關，我哋當初睇到報導都覺得勁搞笑！」坤哥以外，許廷鏗亦係佢嘅「緋聞男友」，胡鴻鈞就話只能一笑置之，佢強調：「Alfred喺我心目中就似一個大哥哥，佢好錫我！佢令我對『同行如敵國』呢個諗法改觀。佢係一個完全不計較嘅人，好多事佢都會預我一份，佢本來可以獨霸舞台，但佢都願意同我分享。有時甚至我會覺得，佢幫我幫到一個地步係會影響到自己，累積下來就是一件很窩心嘅事情。」


今年除咗拍劇成績理想，佢更躋身叱咤「我最喜愛的男歌手」最後五強，搞到鏗鏗出局，胡鴻鈞就話呢個結果，冇令到佢同鏗鏗尷尬：「唔會尷尬，佢之前都話替我開心，仲話All in喺我身上。我覺得真正嘅朋友就係咁！我哋嘅目標係再走得更遠，呢段路，唔理邊個走得快啲，邊個走得慢啲，最重要係大家互相扶持。」



胡鴻鈞接受梁泰來訪問。日前佢出席活動 (資料圖片)面形的確尖咗。 (資料圖片)
(資料圖片)(資料圖片)(資料圖片)