原本落閘唔演風塵女子 周麗淇：點解會搵我

2017-12-30

周麗淇（Niki）最近憑內地古裝劇《那年花開月正圓》，喺中國橫店影視節第四屆「文榮獎」摘下「最佳女配角」，佢喺劇中演繹春風十里戲院紅牌姑娘千紅，Niki日前喺灣仔接受《蘋果》專訪時，佢自爆最初欲拒接呢個角色，幸好最後再三考慮決定接下，跟獎項差點擦身而過。

Niki接獲派演紅牌姑娘千紅，一度難過自己心理關口，佢話：「開宗明義，頭牌係風塵女子，點解個角色會搵我嘅，我未演過，一嚟真係想落閘，我話唔使睇劇本，我唔會接，後來導演叫我睇一集劇本，睇落好有趣，同我諗法唔一樣。」Niki同導演溝通可以用佢嘅方法領悟角色：「搵得我一定唔係風情萬種嗰隻，向來風塵女子標籤咗係爹聲爹氣，好多時只係大部人諗法，於是我今次就朔造一個係我演嘅『頭牌』。」Niki以嗰個年代女子地位入手去設計角色，千紅好有義氣同閱歷。

Niki近年都開拓內地巿場，北上掘金，佢話：「作為演員想多人睇到作品，適合自己都可以去發展吓。」出道18年嘅Niki，人長大，揀角色重質，佢話：「我好好彩出道到o依家，都有作品同角色令觀眾記得，隨成長可以試唔同類型角色，但演員做到角色又出，又受歡迎，真係好似中六合彩咁難。我未來好想挑戰心理質素複雜角色，我好想挑戰演反派，性格係難分正反嗰類，以前我一定唔敢接呢種角色，因為怕handle唔到，o依家有人生經歷同思想，多咗生活經驗，人生日日發生好多嘢，可以放入角色度。」