早幾年前，勁歌金曲總選，已經有網民話，發覺新城豬肉獎個認受性仲高過《勁歌》，理由係「新城啲豬肉，都有分上價肉同下價肉」，《勁歌呢，由同無綫好好關係嘅英皇同星煥（星夢前身）拎晒啲獎，2013年嗰屆，前者13個，後者有7個，領獎嘅唔係Joey就係林峯、鍾嘉欣BB、陳法拉BB同許廷鏗，幾乎十個有六個都係多謝樂小姐（樂易玲），儼如台慶頒獎禮。有網民更列出十大金曲名單，悲嘆：「冇一首聽過！」
四年後有改變嗎？有！梗係有！星夢得嘅獎已經反超前，超越晒英皇，截至晚上十點半為止，星夢暫時有12個獎，英皇得5個。仲有一個鐘頭頒，反超前機會唔大。
另一個改變係，今晚再聽唔到「多謝樂小姐！」呢句，暫時大半晚聽得最多嘅係「何哲圖」三個字，奇在唔見佢太座兼無綫高層余詠珊出席「分享喜悅」喎，反而揸弗人杜之克就喺度。
今晚嘅《勁歌》，卡士弱雞，King Jer形容係卡士史上最弱。
咁，今晚有咩好睇呢？仲要玩足3粒鐘？
1.胡鴻鈞塊面。前日佢出席活動時，的確係好「V」，係完全，完全，完全冇執過相。有網民拎番同一活動佢上電視個樣，稱根本唔覺有「削骨」。Fine，今晚石敢當有份攞獎，大家咪睇下削唔削啦！佢接受傳媒訪問時都話：「我對整容新聞，好豁達，會調整心態，拿自己的臉開玩笑，如果我的臉可以令觀眾歡笑，如果大家感興趣，都還好。」
2.泳兒同翻版泳兒（小背心）許靖韻分前後行坐埋……似到呢…但原來拍埋鍾舒漫，竟然發現原來鍾舒漫同許靖韻先至係「失散姊妹」！
3.都係鍾舒漫。佢同前男友、幾乎要結婚嘅吳浩康都係分前後兩行坐，有啲尷…
4.何雁詩件黃色毛毛褸，隔住個Mon都覺得熱。未知是否想遮掩手上傳說中的傷痕。
5.MK妹馮盈盈嘅個人表演。喺佢面前，另一司儀麥明詩幾乎被隱形。
6.如果悶得滯，可以數下究竟鏡頭前有幾多個出席者係你識嘅…
7.或者數下，同一首得獎歌唱咗幾多次…
