劉美君在80年代唱《午夜情》爆紅，歌詞中提到「誰願意身體每寸任撫摸，誰願半點朱唇吻千個」，而08年她更憑電影《我不賣身．我賣子宮》榮膺台灣金馬影后，在事業上順風順水的她，感情路卻波折重重飽受風霜。曾兩次離婚的劉美君，早前又與拍拖八年的男友Steve分手，想不到失戀才短短兩個月，她最近身邊出現一位混血熟男，日前兩人在上環撐枱腳，疑似新戀情曝光。
本月10日踏入53歲的劉美君，日前晚上約6時45分在上環某間西餐廳，被本報發現跟一位混血熟男蜜會，劉美君穿超deep V戰鬥格兼化行妝，對面坐了一位外表洋化的四眼熟男，兩人在等餐期雞啄唔斷，傾得十分投契。扮到靚靚的劉美君表現風情萬種，不時用身體挨實枱邊，雙手托着下巴，有意冇意間騷身材放電色誘熟男。當食物陸續上枱後，劉美君跟普通女仔一樣習慣相機食先，混血熟男就不斷找話題傾偈，逗得劉美君笑到四萬咁口，之後他們更一碗東西兩份食，氣氛甜蜜愉快。
全程電力四射的劉美君，其間抵不住餐廳的強勁冷氣，前後三次又穿又脫褸，當吃到尾聲時，她更出手搣混血熟男的下巴，又似是體貼地幫對方拭乾淨嘴角。一餐飯吃足兩小時，直至8點15分才由熟男埋單，劉美君蹺着對方手臂離開餐廳，然後轉場行過對面賣日本燒酒的店舖。
熟男點了一杯燒酒慢慢嘆，但原來劉美君滴酒不沾，齋坐陪熟男嘆番杯。離去時熟男再化身護花使者，先行將座駕駛近燒酒店的路邊，以免穿高踭鞋的劉美君行斜路辛苦，之後兩人又拖手又蹺手，甚至攬腰。熟男護送劉美君上車返半山香閨後，才獨自離去。
記者致電問劉美君是否有新男友？她表示：「哎呀！因為啱啱我生日，好多日都有慶祝，呢個唔係新男友，我哋識咗幾十年，唔係十幾年廿幾年，係三十幾四十年嗰啲，真係由細識到大。」對於熟男對她十分體貼，劉美君說：「你話見到佢好照顧我，咁死黨、咁老友識咗咁多年人，就算唔係佢，一般嘅gentleman都好照顧，咁我又着緊高踭鞋，嗰陣又斜路，扶住我上車好正常啫，任何一個gentleman都會做嘅嘢，唔係追唔追，幾廿年追乜鬼嘢，如果我有男朋友，我第一時間會話畀大家知，放心。」
