一年一度嘅《勁歌》總選今晚喺將軍澳舉行，直到目前為止，仍然係星夢娛樂歌手成為大贏家，全晚聽得最多嘅係多謝Herman！
親生仔王浩信喺舊年憑住劇集《致命復活》嘅主題曲《不可告人》拎獎，今年又點會冇預王浩信，佢憑住《欲言又止》同《陪著你走》分別喺「最佳合唱歌曲」得到銅獎同金獎，而銀獎就由吳業坤同JW嘅《原來只因深愛著》奪得。
不過唔知係太興奮抑或係太理所當然，王浩信拎完《陪著你走》嘅金獎，講得獎感受嗰陣，最初可以再同咁多歌手再次同台攞獎覺得好開心，佢又話覺得隻歌唔係屬於自己，點知佢突然間好似hang咗機，唔記得《陪著你走》嘅原唱者係邊個，搞到譚嘉儀即刻補鑊話係盧冠廷王浩信即刻尷尬話自己呢排唔係好夠瞓。
之後到譚嘉儀講得獎感受，佢又話自己除咗好榮幸同浩信合唱之外，仲話好多謝盧冠廷寫咗一首咁好聽嘅歌，但係真正寫呢首歌嘅人，其實係盧冠廷嘅老婆唐書琛，盧冠廷係負責作曲，似乎冇做功課喎！
而最佳唱作歌手獎就分別由糖妹（黃山怡）、王嘉儀同羅力威攞到金銀銅獎，羅力威講謝詞時好短，而糖妹多謝完一大輪後話：「希望下年有更加多作品。」之後就唱出《陽光小姐》。
 王浩信今晚已經拎咗兩個獎。 |  |  |
 佢同譚嘉儀嘅《陪著你走》得獎，但王浩信突然hang機，唔記得原唱者係邊個。 |  |
