電影《捉妖記2》將喺今年賀歲檔上映，乘著上集喺大陸狂收24億票房嘅氣勢，今集仲搵嚟影帝梁朝偉加入捉妖大家庭，早前偉仔就連同女主角白百何，加埋導演許誠毅喺北京一齊接受「蘋果」專訪，談談電影拍攝時嘅點滴。
首集票房成績斐然，隨即拍板開拍第二集，並且加入更多重量級班底，是否對今集抱有好大期望？導演許誠毅話：「今集係想俾驚喜觀眾，有啲嘢唔想重複，早喺第一集我哋建立咗個世界觀方面可以用，而且加多咗新嘅元素，所以今集多咗新人物，好似梁生咁，唔單止演員，妖都多咗好多，希望觀眾會喜歡。」
今次其中一個亮點係梁朝偉嘅加入，係咩原因驅使偉仔接拍？佢話：「我覺得拍一套戲最緊要係緣份，其實我本身好鍾意睇動畫，好多年前我喺上海拍戲時無意中睇到白百何嘅演出，好鍾意呢個演員，後尾佢好多電影我都有睇。」在旁嘅白百何俾偉仔呢番說話氹得笑到見牙唔見眼。
偉仔續說：「前年我又去到上海拍戲，中間有時間得閒又去咗睇戲，就咁啱係睇咗《捉妖記》，感受到班演員喺戲入面玩得咁開心，動畫又做得好好，覺得佢哋拍得好開心。後來又真係收到第二集劇本，睇嘅時候覺得我嘅角色幾有趣同幾可愛，所有因素加埋令我願意接拍。」偉仔又話已經相隔好長時間無拍喜劇：「做演員咩類型都想拍，尤其是我好耐好耐無拍過開心嘅喜劇，所以都特別鍾意想拍呢類型電影。」
早前喺電影記者會上，偉仔曾經透露拍攝過程好痛苦，因為戲中對手係電腦特技造出嚟嘅妖精，所以大部份時間要對住空氣演譯角色，實際上究竟有幾痛苦？偉仔話：「因為拍嘅時候要諗埋對手會點做同表情，夜晚睇劇本時要先諗一次點演，否則無辦法望住空氣去做，如果同演員做戲你會睇到佢表情變化。」呢個難題的確一度考起偉仔：「拍電腦特技完全唔同，因為事先要諗好晒，有時同時要同兩隻嘢(妖)演，咁唔知佢哋會唔會走，我望望吓又唔記得佢哋幾高，眼神要望邊，開始時係會唔習慣，不過拍到後來已經好適應。」
對於偉仔曾遇到嘅難題，相信女主角白百何一早就駕輕就熟，咁兩位喺戲中嘅交流如何？白百何話：「跟偉仔對手戲是有的，但是很少，是導演刻意沒給安排。」在旁嘅許導就話：「你們那一場重逢戲是很重要的，但是他演他的，你演你的，對，沒有對手戲，對不起。」咁今次白百何嘅角色同第一集有咩分別？佢話：「我想是角色愈來愈像女生吧，服裝和造型都有很大的變化，然後上一部其實不太分得出我跟井栢然誰是男，這一部很明顯分得出我是女的，相信是電影變有錢啦，可以給角色用護膚品啦。」
咁偉仔又同邊位演員較多對手？佢苦笑話：「空氣！因為我戲入面拍檔全部都係妖，所以都係空氣。其實拍嘅時候有好多技術上嘅問題，唔似同人做對手咁，我又唔可以掂佢，初初我成日同導演講，我可唔可以攬吓佢，掂下佢？導演話唔得㗎，好難做㗎，最好唔好啦，咁變咗除空氣外我基本上無其他對手。」
對於演員們嘅表現，許誠毅話相當滿意：「我係動畫片經驗出身，好多時係一邊拍一邊學點同演員合作，第一集時百何都幫咗我好多。」旁邊嘅白百何繼續埋怨導演無安排同偉仔對手戲：「那你還這樣對我，第一部有一場拍睡覺，很經典，他說要拍我睡得很有自信，我都睡著了，那來自信。」
許導再補充：「呢部拍嘅時候我都仲學緊，我對偉仔嘅演出真係好滿意，佢自己演諗到好多嘢，無其他嘢喺佢身邊，睇到佢好專業，換咗機位都演得番晒，好準。」最後問到上集有咁驕人嘅票房成績，拍攝過程中會否好大壓力？許導笑言：「通常老闆講要咩成績我當聽唔到，我唔想因為票房壓力而影響創作，最緊要係點做好電影。」
 攝影：曾小嘉 |  電影《捉妖記2》將喺今年賀歲檔上映，早前偉仔就連同女主角白百何，加埋導演許誠毅喺北京一齊接受「蘋果」專訪 |  係咩原因驅使偉仔接拍？佢話：「我覺得拍一套戲最緊要係緣份，其實我本身好鍾意睇動畫。」 |
