蝦頭42歲生日 羅家英笑住話：俾機會邵子風跪地求婚

蝦頭 (楊詩敏)同羅家英、衛詩雅、麥包(麥長青)、林耀聲、陳宇琛(Sam)等人，最近齊拍電影《西謊遊記之唐僧踩錯界》，日前撞正蝦頭42歲生日，監製陳家樂特登安排咗搭正凌晨十二點就送上生日蛋糕，俾蝦頭一個surprise。

而經理人男友邵子風亦有嚟片場探班，大合照後壽星女同劇組演員逐一擁抱，開心咁話：「好開心呀，多謝你哋同我慶祝，生日願望希望拍攝順順利利，票房大賣，可以做多啲搞笑、感動人心既作品。」71歲嘅家英哥鬼馬地用cream為蝦頭「畫龍點睛」，仲搞笑咁話：「好啦，可以掟蛋糕喇！今晚俾個機會邵子風攞戒指出嚟跪地求婚！」蝦頭笑晒口話：「有人娶咪結囉！」

蝦頭開到聲，作為男友嘅邵子風即展示心意禮物：「雖然我冇準備戒指，但呢份禮物好有意思，係印第安人文化手工藝品捕夢網(Dream Catcher)，相傳掛上捕夢網能夠捕捉好夢，當中亦有我嘅摩斯心意密碼『you are not alone』，可以放喺床頭一齊追夢，哈，估唔到幾十歲人先去追夢！」蝦頭冧到暈，sweet到爆咁話：「咁咩年紀都可以追夢嘅！其實佢送乜俾我都好滿意。」邵子風話未有打算結婚生仔，要睇上天嘅安排，佢推莊話：「家英哥就有心有力，我就冇能為力，如果家英哥整個(bb)我又整個啦。」壽星女又收蛋糕又收捕夢網，之後仲開心萬歲宵夜魚蛋粉。

蝦頭話好開心佢哋俾咗個驚喜佢。
男友邵子風都有到場。