有「翻版徐子淇」之稱、模特兒出身嘅傅嘉莉(Kelly)，2015年簽無綫做親生女，但緋聞一單接一單，的士啜肥叔叔（相關新聞：http://bit.ly/2CFm6nC）、又被指同「富豪B」做朋友，同時又喺米蘭攬錫法拉利CEO莊天龍，之後又被爆同莊天龍喺峴港一家酒店泳池邊歎spa咬耳仔（相關新聞：http://bit.ly/2CQtHg6），有傳因為今次峴港之旅曝光，令傅嘉莉「被單身」，目前要努力工作、趕拍大台劇《包青天再起風雲》，聽講呢套劇啲進度都好趕，難得Kelly喺元旦有假放，梗係要休息一下！


噚日下晝3點左右，見到Kelly坐住架七人，由香港仔寓所出發，但同行嘅唔係佢嗰啲異性朋友，而係爹哋、媽咪、細佬同女朋友，一行人去咗紅磡，到借庫熱點——紅磡觀音廟拜神，佢哋落咗車之後，第一時間去咗買拜神用嘅祭品同鮮花，之後就入廟拜神。


Kelly似乎係平時有拜神嘅人，睇見佢好似好熟「架步」，裝香嗰陣又念念有詞，許完願兼裝完香之後，一行人上車之前又去咗掃街，之後再轉去黃埔另一間觀音廟裝完香先走人。真係好神心喎。


Kelly之後又去咗觀塘街市陪阿媽買餸，結果話咁快就買齊，之後同屋企人去將軍澳，睇嚟係佢爸爸媽媽嘅屋企。


事後Kelly接受傳媒訪問，佢話：「嗰日我本來係放假，但係我爸爸媽咪想去觀音廟拜神，希望我新一年事事順利，所以我咪陪去囉。」佢仲話難得一家人聚埋一齊：「拜完神之後咪走去街市買嘢返屋企打邊爐，一家人坐埋一齊真係好開心。」


講到《包青天再起風雲》，Kelly話主要同張振朗同張頴康有對手戲：「我最近同張振朗有拍對手戲，佢o依家嘅情況都幾好，只係唔可以有太大嘅動作戲，希望佢新一年順利。」佢仲話：「遲啲仲要上橫店開工，聽講嗰邊啲天氣好凍，所以我o依家都要做好準備。」



攝影：畢紹基、吳耀輝傅嘉莉同爸爸去買祭品。傅嘉莉去年4月同莊天龍同遊越南
好誠心喎
拜完神去咗邊呢？去咗掃街醫肚買餸返去打邊爐