李克勤今晚喺「十大中文金曲 我和你音樂會」中，奪得金曲40全球傑出歌手獎，及憑《失魂記》獲得全國最佳中文歌曲獎，佢入後台接受訪問時第一句就話：「我淨係希望啲咳可以快啲好番，因為o依家左鄰右里都一齊咳，所以想快啲好番。」


講到佢2017年係豐收年，克勤話：「自己都好開心，因為係收穫豐富嘅一年，多謝公司、fans同阿倫（譚詠麟），踢波嗰陣盡量交多啲波俾佢啦！」問佢有冇時間休息，佢話：「參加埋今晚嘅頒獎禮，就完成咗自己嘅承諾，所以聽日會放一日大假，同老婆去燭光晚餐，之後就要開工。」克勤又預告明年會見得少咗：「17年係李克勤喺廣東歌好豐盛嘅一年，18年就應該係做國語碟，因為自己呢兩、三年都做好多內地嘅show同節目，認識咗好多內地嘅嘢，嚟緊呢一年會去多啲內地，去唔同嘅地方，搵一啲有特色嘅音樂人合作，咁會少啲喺香港見到我。」


問到克勤會唔會再接真人騷同歌唱比賽節目？佢話：「其實所有有比賽成份嘅節目或比賽都係一個騷嚟啫，都係想增加曝光率同想大家認識我多啲，自己就冇限制嘅，但帶住個仔去哪兒嗰啲就唔會喇，驚佢唔肯，（咁你有冇問過個仔？）我唔敢問呀！萬一佢肯咁點呀？我覺得小朋友都係要專心讀書。」


問到佢成績咁好有冇買啲咩獎勵自己，克勤話：「其實上年3月已經買咗架福士俾自己，架車係同我同年紀嘅，早幾日揸咗出街，仲撞到阿徐，因為架車之前要搞嗰啲牌費保費嗰啲，9個月之後終於可以揸得喇，好開心！一開門就聞到嗰陣50年歷史嘅味道，鍾意就好鍾意囉，不過我老婆聞到就即刻走呀，仲叫我盡量都唔好要佢坐呢架車，不過男人鍾意嘅嘢好難解釋嘅。貴就唔係好貴，20幾萬啫，比起而家百幾萬嘅車就好平囉，自己都有首歌叫《五十路》，下星期就會用架車嚟拍MV。」



（攝影：陳俊強）克勤今晚連奪兩獎佢話自己啲咳仲未好，希望早日康復。